Deanu dilis oidnosta čuovga

Vaikko Detnui gorgŋon luosaid mearri lassánii mearkkašahtti olu mannan jagis, luossamáddodat, mii johkii máhccá, lea ain hui uhcci, go vuhtiiváldit vihtta jagi joatkašuvvan guolástangildosa Deanus ja Deanuvuonas. Lassin Norga gilddii luosa mearrabivddu viidáseappot measta olles Finnmárkku rittus geassit 2025.

”Árvvoštallat ahte mearraáiggi árra muttu jápminlogu stuorrun maŋimuš guđa-čieža jagi áigge lea mearkkašahtti sivva luossamáddodagaid heajos dillái. Dan dihtii ain uhcit mearri merrii vuodjan luossaveajehiin máhccet mearas fas Detnui ráves gođđoluossan”, Orell muitala.

Detnui gorgŋon buggeluosaid mearri lei beali uhcit go mannan goargŋunjagi 2023. Seammalágan áicamat ledje viiddis guovllus Norgga Nuorta-Finnmárkkus ja maiddái Njávdámis. 

”Stuorra molsašuddamat máddodagas leat dábálaččat buggelussii, ja buorre jagiid maŋŋá máddodagat sáhttet uhccut garrasit”, Orell gávnnaha. 

Uhccumii sáhtii váikkuhit maiddái norgalaččaid viššalis jávkadanbivdu jagi 2023. Dán jagi johkii gorgŋon buggeluosat leat boađus jagi 2023 gođus. 

Buggeluosaid jávkadanbivdu jotkojuvvui rastábuođuin Deanu váldorokkis geassit 2025. Maŋŋit giđđadulvvi ja garra rávnnjiid dihtii rastábuođu ceggen ádjánii. Buođđu bivddii sullii 28 000 Detnui gorgŋon buggeluosa. Buođu bajábeallai besse goittotge sullii 60 000 buggeluosa.