Boazodoalus garra jahki
Luondduváriidguovddáža (Luke) boazodoalu gánnáhahttivuođa rehketdoalu mielde boazodoallojagi 2020/21 boazodoalu gánnáhahttivuođagerddon njiejai 0,25:ii ovddit jagi 0,55:s. Fitnodatdoalli sisaboahtu njiejai beallái ovddit jagis ja lei gaskamearálaččat 5 770 euro.
− Gánnáhahttivuohta njiejai oppa boazodoalloguovllus. Sámiid ruovttuguovllus gánnáhahttivuođagerddon gahčai 0,39:ái ovddit jagi 0,81:s ja eará boazodoalloguovllu gánnáhahttivuođagerddon unnui 0,14:ái ovddit jagi 0,44:s, muitala dutki Marja Vilja Lukes.
Bohccobierggu buvttadanmearri njiedjamin
Boazodoallojagi 2020/21 boazodoalu oppalašbuvttadeapmi lei 15 proseantta vuolit go ovddit jagi ja bázii 38 900 euroi. Oppalašbuvttadeamis boazodoalu vuovdinsisaboađut šadde 17 200 euro, njiedjan ovddit jagis lei 18 proseantta. Johtalus- ja boraspirevahátbuhtadusaid oassi oppalašsisaboađus lei 23 proseantta, eará sisaboađuid dego bálgosa máksán bargobuhtadusaid oassi 16 proseantta. Boazodoallodoarjagiid ožžo sulaid 6 000 euro. Doarjaga oassi oppalašbuvttadeamis lei 15 proseantta.
− Dálvvi 2019/20 garra dilit vearuhedje boazomeari, ja dát oidno njuovvanmeriin ja bohccobierggu vuovdinbuvttadeamis áigodagas 2020/21, Vilja gávnnaha.
Buhtadus dálvvi 2019-2020 eahpedábálaš dálkediliid mielddisbuktán vahágiin ja lassegoluin máksojuvvui ohcciide easkka juovlamánus 2021. Buhtadus beaiváduvvui jagi 2019/2020 bohtosiidda. Dát loktii jagi 2019/2020 doarjjasupmi measta 12 000 euroi.
Goluid lassáneapmi joatkašuvai
Buvttadeamis šaddan golut lokte 2020/21 njeallje proseantta ovddit jagis ja ledje 54 600 euro. Goluid loktan bođii eanaš mašiidna- ja bierggasgoluin ja iežas barggu bálkágáibádusaid stuorrumis. Fitnodatdoallibearaš barggai boazobargguid gaskamearálaččat 1 290 diimmu, lassáneapmi ovddit jagis lei gávcci proseantta.
Boazodoallofitnodagaid gaskamearálaš ealihanboazomearri njiejai ovddit jagis viđain ja lei dál 197 ealihanbohcco.
− Fitnodatbohtosa oažžu, go oppalašsisaboađus geahpedat buot buvttadangoluid, ja dat čujuha boazodoalu báhcán 17 300 euro dáhpaga beallái. Biergokilo guovdu rehkenastojuvvon buvttadangoasttádus lei 28,8 euro ja fitnodatdáhpa šattai 8,3 kilo biergokilo ektui, Vilja muitala.
Boazodoalu bohtosat neahttabálvalusas
Boazodoalu gánnáhahttivuođačuovvuma bohtosat leat oaidnimis Luke Taloustohtori-siidduin Boazodoalu neahttabálvalusas. Bohtosiid vuođđun lea boazodoalu gánnáhahttivuođarehketdoallomateriálas, mii mii čoggojuvvo jahkásaččat 75:a badjel 80 ealihanbohcco oamastan boazodoallofitnodaga dieđuin.